一隻天生聾的安哥拉貓Joe仔，五歲時被Jessica接收，老年雖然面對年年傷病困擾，但這貓兒都努力捱過。惟生命有限時，Joe近年證實腎衰竭，醫生更曾問主人是否要堅持到最後一刻？Jessica遂問Joe仔的意願，告訴他醫生建議他多飲水，否則情況會變差及需要打皮下水，這隻懂性的貓貓真的聽懂人話，立即走去飲水示意。而且每晚叫醒主人陪他飲水。曾有一段時間，醫生見到其指數改善也嘖嘖稱奇。
較醫生預期Joe仔的壽命多了五個月，有一天，在這段期間，貓主經歷媽媽患病及多樣家庭事務需處理，壓力極大，幸好每天回家看到Joe仔，才得到心靈上最大安慰。這位生命鬥士活到離世前最後一天，懂性的他終不捨地與主人道別，主人在悼文憶述，當日貓兒叫主人陪伴到最後一刻的情況：
「我今日請假陪你好唔好，你嘅頭就輕微抽搐咗一下，我再問多次，你都係隨即抽搐咗一下，我收到了，我確切知道你想我陪你。」
就在2019年3月11日的那一天，Joe仔在Jessica的陪伴下，活到最後一分一秒。Jessica知道現在Joe仔已走到無病痛的天堂，她也希望透過文章，讓更多主人明白動物真的很有靈性，希望主人用心同和他們溝通，珍惜與他們一起的每分每秒。
Jessica 寫給Joe仔的原文如下：
//Joe仔，今日，你徹底自由了。
你離開咗我兩星期，感覺好似好耐咁，我好掛住你。你好嗎？
回想起你五歲時接收你，好多唔慣，因為你係猛男，比較大隻結實，我無抱過咁重嘅貓貓，頭幾日有啲手足無措。而我當時唔太識同你溝通，因為你聽唔到嘢，唔知點樣你先明。
慢慢地，你我都習慣咗彼此嘅相處方式，雖然你聽唔到，但你係會睇我地嘅表情同動作。可能你天生嘅缺憾，令你好敏感，好神經質。記得有幾次你唔知我係你身後，當你一轉身見到我，嚇到成個彈起，好傻瓜好好笑。呢啲你嘅生活點滴。。。我會記住。
早幾年開始，你成日會係夜晚大叫，家人覺得你係見我未返，所以先叫，但直至後來見過醫生，才回想返應該當時你已有骨刺，但你好堅強，忍痛能力好强。其實，你好叻仔好健康，除左十歲時，割過pat pat一粒瘡仔外，都無乜病過。但萬物都係逃離唔到歲月嘅摧殘
，近兩年，你成日嘔，亂便便，看完醫生後話你有慢性腎衰竭。。。慢性，無知嘅我仲以為個病情真係會慢慢先嚴重起來。。。
上年七月再帶你覆診時，醫生係毫無預兆下話你已踏入第四期，通常一般都只有120日壽命，當刻我係接受唔到你只會剩返三個月命。。。。當然，醫生有話每隻貓不同，有啲仲可以活上兩三年。。。。
照計數，我係好怕你係我生日嗰排會走，我想你陪我渡過生日，你好乖，做到了！好多謝你！我知你係感受到自己身體漸變虛弱，呢年你係特别痴我，咁多年你都唔鐘意被抱，但你呢年幾成日主動企起身伸手拍我要抱抱。變咗嗲嗲豬，而且愈來愈懂事同生性，好有靈性，定係你一向都係，只係我忽略咗你？
自你有腎病起，醫生要我每日灌水俾你，最記得初試時，你係極反感反抗，點試都失敗，我好沮喪，只好喊住咁望住你傾，話:Joe仔，你唔肯俾我灌水，你會死㗎，你有病呀，你死咗無你陪我，我好慘㗎。。。講完一陣，再試下，點知你自己主動嚟舔，就算有時你唔想飲，但我放入你咀巴你都肯吞下，無反抗的。仲開始識半夜拍醒我叫我餵水，叻豬！係嗰次起我更加知道你係超明事理兼好有靈性嘅貓貓。
同你好有緣嘅劉醫生係你走後話:「佢係一隻好特別既貓，我地日日睇狗睇貓睇咁多，好少睇到好似佢咁樣識同你”講道理”既貓。
當佢覺得自己唔舒服，同意俾你診治既時候，其實佢超級乖。當佢覺得自己冇事既時候，佢當然唔俾我地掂啦。」
伯伯，其實，我覺得真係對你唔住，一月起，因媽媽身體有事要做手術，婆婆同時間又跌親入院，我嗰幾日又係醫院陪瞓，縱然我晨早六點幾返嚟睇你餵你，但留得一陣又要回醫院等醫生，再去第二間醫院睇阿婆，到晚上十一點幾先返嚟再餵你水同藥。。。之後我又走了。。。嗰幾日我超大壓力，唯有見到你嘅一刻，係全日最開心嘅時刻，但真係好慚愧嗰幾日陪你嘅時間加埋都唔知有幾多。。。好驚你寂寞，唔開心！但你真係超級無敵生性，不但無嬲豬，仲好明事理，好對唔住呀，Joe仔！到到媽媽岀院，不用到醫院陪瞓了，我發覺你無再半夜拍醒我要我餵水，你知我攰，何其懂事！
係我要照顧人嘅時候，你係我最大力量同支持，真的！常説貓係好記仇，但不適用係你到，媽媽常話你，佢唔明你係因病所以先亂便便，但係佢岀院後，你都成日企係佢身邊，好似就係話緊俾佢聽，你係支持佢陪伴佢咁，你好乖！
記得你走前一排，你不單只痴我，你逢人都拍下叫下，我無見過你會咁，心知你愈來愈珍惜身邊人。但估唔到事情嚟得咁快！
你走前一星期開始唔食嘢，俾你最愛嘅零食醬，你想食但都無食到。初時以為你無胃口，又要轉下口味，但到第二日俾乜你試都唔食，我就緊張，之後就帶睇醫生，話你係胰臟炎，要灌奶，我嘗試咗，但你就嘔，仲要連藥都嘔埋。但我又要返工(好難再請假，一月已請左大半個月假)，夜晚仲要睇完阿婆先返屋企，但都盡趕回家，早上遲啲岀門去餵多啲你食嘢。。。但你都係食得唔多，仲開始成日瞓厠所，嗰幾日仲係好凍，捉你入房又岀返厠所(你走咗之後先回想起你當時係想揾地方收埋自己吧)。星期六再帶你睇醫生，醫生幫你打水，叫我繼續餵奶俾你。我就盡量餵多啲，你嗰次好合作，但點知第二朝四點你柯爛爛，搞到成身同周地臭臭，我唯有起身處理，都無辦法要同你沖pat pat同腳，問醫生你咁嘅情況點算，就叫我轉俾糊仔你食，你都好乖肯吞食。當晚係朋友協助下，成功幫你打咗第一次皮下水。。。
但當晚夜啲，你嘅後腳開始無力，行唔到，全晚就係咁爭扎想起身，但起唔到，我好擔心同心痛，成晚都無乜瞓陪住你。第二朝你直情全身攤軟咗，因為我要陪媽覆診，匆匆餵你食左糊仔後就岀左去，心想你應該因食得太少無力，要快啲返去再餵你食嘢先得。。。
陪阿媽等候覆診期間，send咗你嘅片俾診所，後來姑娘覆我。。。點知答案係。。。你情況顯著差了，差不多時候，問我會否想你舒服啲。。。，當刻。。。我呆咗，眼淚不停流，我答，下，佢仲肯吞水吞嘢食㗎喎。。。。我唔想帶你去。
之後即刻趕返屋企，抱住你喊，問你，我今日請假陪你好唔好，你嘅頭就輕微抽搐咗一下，我再問多次，你都係隨即抽搐咗一下，我收到了，我確切知道你想我陪你，唔信嘅人會話係巧合，但我更相信你係回應我。陪咗你大半日，你愈來愈虛弱，但都仲係肯吞水吞嘢食，我知你好堅強，唔捨得我，但我唔忍心見你痛苦，我叫你係時候走呀，多謝你陪咗我咁多年，好在有你，尤其呢兩個幾月。亦都好對唔住你，我呢排太忙，無好好咁陪你。。。講咗好多別離嘅説話，講咗好多次我愛你。之後叫你欣賞下個天，難得落了多日雨後變晴，你又真係望~~
我知貓狗臨走前都想行一轉屋企每個角落，但你已經行唔到，我就抱住你行去每間房，廳，廚房，厠所，都見到曬所有人，再返房，你就好似了咗心願咁小便了(嗰兩日你都無大小便)，有人話貓貓走前會失禁，所以我有了心理準備，但都係好需要勇氣去陪伴你嘅，唔想你孤獨咁走，我一定要堅強！
我醒起全日我都抱咗你上床，你無返過床邊你常瞓嘅窩裡，咁我抱埋你落去同你講，嗱，睇埋呢到呀，你平時就係呢到望住我瞓㗎啦。之後又抱返你上床，叫你望下窗外，有半彎月亮好靚，你又真係望咗一陣，然後轉望向我，呼吸開始急。。。。但你一路都好勇敢堅強，我不斷捉住你手腳，暖住你，你最後五分鐘比較辛苦，但都無慘叫同大叫。。。你真係好乖好勇敢。。。就咁，你係11/3/2019 9:16pm係我懷中返回天家了。
Joe仔，好多謝你，你俾我係最後一日陪伴到你，送到你走，而你係咁有靈性！我上星期已經想打篇文去記錄你走嘅情況，我怕我會唔記得，但打唔到，今日為咗紀念你，硬著頭皮完成了。你唔洗擔心我啦，我會努力去生活，今日再見到你，傷心但都安心了，真真正正送走你了，你要安好呀，你白雪雪，今日你都好靚仔，做天使真係最合適不過啦！我知你會守護住我嘅，我真心感受到你有幾愛我，因為你聽唔到，你要明我相信係要比平常貓更用心去感應同理解我，但你真係好明我！多謝你！
你都會永遠在我心中，你要開心快樂呀！
遲一點，天上見~~
Joe仔，安哥拉千禧貓貓
2000夏-11/3/2019//
